【DAY5 日間】特急麵飽超人JR x 岡山城 x 後樂園岡山篇

移動旅程之規劃

踏入第5天，這天基本是移動旅程，目標是傍晚返回福岡，在規劃時，主要考慮有冇可能途中再玩多一個城市，但松山到福岡距離大大話600km+，要邊走邊玩，真的可能嗎？答案是ok的，只要好好利用山陽新幹線節省時間，起碼有5種方案可供選擇。

吳港方案：早上由松山觀光港坐船到吳港觀光，下午再經廣島乘新幹線返回福岡，優點:輕鬆，缺點:之前已途經吳港，重覆路線

尾道方案：早上乘JR到今治，再轉巴士到尾道，可選擇在今治或尾道觀光，傍晚經尾道乘新幹線回福岡，優點:可按情況選擇景點，缺點:轉折費時

岡山方案：早上乘JR到岡山遊覽，下午乘新幹線回福岡，優點:輕鬆，缺點:季節唔配合，擔心岡山後樂園可能冇想像中美。

小豆島方案：早上乘JR到高松，轉渡輪遊覽小豆島，下午由小豆島坐渡輪到岡山港，再轉巴士到岡山，傍晚乘新幹線回福岡。優點:途經多個景點城市，用盡張JR pass，缺點:極為轉折

姬路方案：早上先到岡山，然後直接轉新幹線/JR到姬路城或倉敷，傍晚乘新幹線回福岡。優點:景點著名，缺點:時間極緊迫。

在規劃初期，個人傾向尾道方案及小豆島方案，原因係尾道有出名既美食尾道拉麵，同埋"貓之細道"，萬一去唔成貓島可作安慰獎。小豆島則風光如畫，老婆想去。不過我地後來都否決左呢兩個方案，原因係考慮到移動旅程要帶上大行李，太轉折會好辛苦，另外就係行程較花時間，搭新幹線時可能會撞正下班高峰。所以最後都係選擇岡山方案。後來證明呢個選擇係完全正確，岡山後樂園亦有驚喜，非常值得遊覽！

由松山到福岡移動一天遊，五種方案比較

麵包超人特急JR唔好上錯卡

要善用移動旅程，首要條件係早起身，為左可以早d到岡山，我地將會乘坐8時許班特急JR，不過尋日老婆投訴，話早餐食得唔好，所以今日出發前特別係酒店食自助早餐，一般去旅行，都好少預定埋酒店早餐，覺得出面既食物會正d，不過松山REI 個自助早餐卻例外，早餐有西式及日式，當中日式有齊松山地道美食，包括鯛魚飯、五色麵以及最正既鮮榨柑汁，呢個柑汁係行大街道時老婆已經點名要飲，而家自助早餐佢仲唔一連幾杯，由於實在太好味，又唔記得影相，唯有補上網址供大家參考。

今日我地搭去岡山既JR，係一列麵包超人特急車，雖然係煩忙時間，但唔係太多人，利用JR pass坐自由席已相當足夠。要注意呢班車有兩個終點站，分別係岡山同埋高松，架車去到丸龜附近時，就會停車分體，然後各自去唔同既目的地。所以，上車前一定要上返去岡山既自由席車卡，千其唔好坐錯。

呢列麵包超人火車，除左車身有麵包超人圖案外，車箱內也有卡通，廣播亦係卡通配音，非常特別。不過可能係正值上班高峰，車內打工仔乘客大多爭取時間補眠休息，與車箱設計有點格格不入。

呢班車雖然冇新幹線咁高速，但係也相當快，並會途經今治等地，當列車去到丸龜時會有廣播叫乘客去返自己所屬車箱，呢個時後老婆竟然話想去廁所，我叫佢忍一忍，因間去錯車卡，行李去岡山，人就去高松，到時就悲劇了。

列車用左幾分鐘就完成分體，然後就明顯感到加速直上瀨戶內海大橋，由車上往外望，可以飽覽瀨戶內海美景，認真一流！過左大橋就進入本州範圍，行多半個鐘頭就到達岡山，全程不用三個鐘。

睇清楚去岡山既自由席，去岡山係第4第5卡！

這裡是往岡山的月台，千其唔好上錯車卡

今日就係搭呢班特急JR

車箱內也有麵包超人既公仔

四國有好幾條線路都有麵包超人車卡

呢條就係瀨戶內海大橋

第四度穿過瀨戶內海

烏黑岡山城

去到岡山站，大概已經11時，出閘時順便問問coin locker位置，幸好岡山的locker比較多，也接近JR站，把大行李都塞進locker，然後輕裝上路。之後從東口出發，直接跳上往東山方向電車(JR pass 免費)，搭兩個站在城下下車，然後按指示穿過地下隧道，很快就會見到岡山城，全程也不過10多20分鐘，非常方便。

岡山城和後樂園其實只係一河之隔，我們選擇先遊覽岡山城，論歷史價值，岡山城不及松山城/姬路城等現存天守，但其烏黑的顏色，在日本的城堡中較為獨特，而且附近的庭園景色也很優美，加上岡山素有"晴天之城"美譽，絕對係攝影發燒友聖地。我地買左張岡山城+後樂園共同券，就直奔天守，由天守向下望，可飽覽岡山河景，亦可以看到後樂園全貌，非常美麗，在天守內，有買特色手信及試穿公主服的地方，這裡的公主服要比廣島城的更豪華，不過只限定每小時正點頭五位，想試穿的朋友就要預好時間了。

岡山JR站

岡山電車，去岡山城就要答東山方向

就係呢度落去

沿河邊行就冇錯架喇

岡山城，好靚！

黑色城堡，同松山城剛相反

庭園配城堡

正面全景

嚇死人咩

每個城堡都緊有既原木

想著豪華版公主服就要校準時間

前面就係後樂園

岡山城同後樂園就係靠呢條橋連接

河中倒影，正！

全程最快樂的時刻－後樂園

參觀過岡山城後，就直接行過對面後樂園，順便影下河景，河岸傍有茶居同埋天鵝船租借，適合悠閒慢遊。過左岡山城前條大橋，就係後樂園既入口，遊客可以選舉由南門或正門入，兩者差別不大，入到去都係兜一圈順路遊覽。我地選擇較近既南門進場。

話說黎後樂園前，大概知道岡山紅葉極盛期在11月尾。去到12尾，已打定輸數睇唔到紅葉，更別說櫻花，我地亦會預計綠油油的草地變黃，所以早就把期望降低。不過入左南門，親眼看到變黃的草地，配上藍天碧水及綠樹，反而覺得更靚，每種顏色分配恰到好處，與一遍綠色相比另有一番美感。作為日本三大著名庭園，後樂園絕非浪得虛名，即使沒有紅葉櫻花，單靠湖景藍天與古色建築已經夠殺食，再加上大大個岡山城做背景，間直係完美配搭。

後樂園的花草樹木種類繁多，12月時正是山茶花盛開季節，這裡就像一個放大版既縮景園，小橋流水竹林巨石，只要你想得到既庭園景色，都可以找到。就算唔影相，齋慢步小休，享受藍天，亦已經非常寫意。另外後樂園亦非常適合帶長者黎參觀，這裡沒有太多難行山徑，景物亦開揚，基本上只要順路而行，就已經可以沿途美景盡收。

期間在一間茶居門外，等老婆去廁所之際，竟然有一隻可愛的黑貓主動走黎聊我玩，我把牠抱到凳上一齊坐著欣賞藍天，他就不斷古...古...古...似乎佢都好享受，相比貓島班掛住食既貓，呢隻黑貓更討我喜歡，呢個真係整個旅程中最舒服快活既時刻。不知不覺間，同隻黑貓玩左成半個鐘，老婆先返來，原來佢去完廁所後發現左一棵盛開既紅葉，仲要對正岡山城，構成一幅極佳既靚景，正好佢影紅葉我玩貓，各自得到滿足。之後我地同黑貓selfie，懷著依依不舍既心情同佢say goodbye。接著我地再睇埋竹林，光脫脫既櫻花林，感覺都幾特別，最後由南門離開，完成後樂園之旅。

後樂園真一個好地方，令人喜出望外，可能是過了紅葉季節，遊人不多，反而行得更舒服，呢到跟廣島縮景園同樣都係一步一景，黎岡山絕不可錯過！大概2時許，我地返回岡山JR站，順便逛埋附近既bic camera，買左一個mini 超任case同埋一堆限定snoopy文具，然後就到車站買便當，準備乘3時許既新幹線到福岡。