【DAY4 晚上】大街道商店街 x 松山摩天輪 x 道後溫泉愛媛篇

夜遊路線規劃

去完貓島睇完日落後，返到酒店大概七點鐘，由於昨天病倒，沒有按原訂計劃坐摩天輪。所以今天要將行程壓縮，在摩天輪和道後溫泉之間二選一。道後溫泉係松山必到景點，放棄摩天輪，直接到道後係正常人都會揀既選擇。不過老婆同我講，又想去摩天輪，但又好想浸溫泉喎......我睇下個地圖，直覺覺得唔可能，兩個地方一東一西，而且道後溫泉10點半last order，即係要四個鐘內去晒兩個地方，仲要食埋野，有d難喎。正當我諗到頭爆之際，突然褲袋張電車pass提醒左我，其實松山摩天輪就係松山電車總站傍，而道後溫泉就係尾站，剛好可以用電車連接呢兩個景點。而且我地仲有一個優勢，就係酒店位置對正大街道商店街，咁樣我地就可以先逛市中心商店街，然後順道到著名食店五志喜晚膳（本來尋晚打算食呢間），食飽再行過去松山站坐摩天輪，然後再乘電車到道後溫泉。我本來就冇打算浸溫泉，所以去到之後可以兵分兩路，老婆浸溫泉，我就行埋道後商店街，兼且去埋Donguri Republic，再約實時間係電車站等，然後回程返酒店，咁樣就可以各取所需，一晚去晒大家想去既地方。就咁決定啦，開始起行！

夜遊路線，起點REI酒店，最後一站係道後溫泉，之後搭電車回酒店

大街道shopping + 五志喜晚膳

首站大街道，其實我對呢類商店街沒特別感覺，反正每個城市總有一兩條，對於男仔關心既，通常都係動漫電玩，會有晒既定目標。女仔呢？我真係唔知......我老婆每次入到呢d商店街，總會有d收穫，不論係藥妝食物文具，甚至之前係廣島去到jump shop，佢都可以買到本漫畫冊。今次我特別提醒老婆，藥妝等手信可以在福岡才買，無謂一抽二袋，聽日仲要去岡山。結果，一入到去大街道第一間藥粧店，已經忍唔住買左d手信，事後證明，呢類野福岡買比較抵。

至於我呢，大街道附近間一六本舖本店我早已係google map bookmark左，呢間野係松山歷史悠久既甜食店，之前上網已經知佢地推出左一款士多啤梨味蛋糕，係香港一款日本直輸入既蛋糕小食，閒閒地好幾十蚊，呢到成條都只係千多日幣，抵買啦！老婆見我買得咁開心，又再加買左d分開包裝既蛋糕，160 yen 一包，買黎當旅途小食都ok喎。一六本舖雖然係老店，而且大街道呢間係本店，不過就唔係咁多人黎，可能同我地夜黎有關。

其實，大街道商店街有唔少特色食店，老婆就間間都想去試下咁，不過我同佢講，我地早有目標，要去下一站五志喜食鯛魚。離開大街道沿著google map指示，我地好快黎到五志喜，好驚奇呢個食飯時間，竟然可以唔洗等位直入，搞到我有一刻以爲自己入錯店舖。

呢間五志喜，係松山出晒名既地道老食店，主打由五種口味配製而成既五色麵，睇落都幾有營養。店員安排左個小廂房比我地，坐得好舒服，環境很好。我地叫左兩客，一客係全隻原條鯛魚麵，利用funpass可以有優惠，另外叫左一個鯛魚熱食套餐。味道如何呢？我會以唔錯黎形容，但平心論又未到一試難忘個level，不過我都認爲值得一黎，五色麵同鯛魚都係松山特色地道美色，千幾二千yen就可以食到，冇理由唔試下話......

一六本鋪出左新口味

切開後的樣子，略甜

禮盒裝，有其他口味

原條鯛魚，非常美味

今晚享受豐富三色麵大餐

搵餐死既「伊予鐵高島屋摩天輪」

食飽飽繼續行程，呢個時候大概8點多，我地打算慢慢行去松山站，再搭電車，由五志喜行去松山站其實唔遠，不過摩天輪卻好難搵，點解呢？因為摩天輪設係高島屋百貨既九樓，但係當我地去到既時候間百貨公司已經關門了，最尾都係搵唔到路上去。唯有去七仔問人，店員好好心機用日文同我講完一輪後，然後親身帶我去唯一通往九樓既lift，去日本問路就有呢個好處，日本人係會直頭帶埋你去，佩服！上到九樓，只要show出電車pass，就可以免費乘搭。呢個摩天輪有d似大阪既阪急摩天輪，都係係大廈頂樓，老實講，夜景黎講只係一般般，下次有機會，記得揀係日頭或者黃昏日落，睇晒成個瀨戶內海，應該會幾正。呢個摩天輪有個好處，勝在夠慢，正好俾情侶談情，而且座位會自動供暖，非常貼心。

松山的夜景，似乎白天來看會更好

遠處可以看到松山城

想影遠處瀨戶內海，但摩天輪拍夜景真係好困難

摩天輪下竟然是聖誕燈飾

道後溫泉與毛巾

玩完摩天輪後，時間已經差唔多九點，當我用 google map check 電車時間，才發現道後溫泉尾班車在10時許就會開出，咁即係話，我地仲有1個鐘頭時間......不過好在電車都唔係太長車程，由頭站到尾站，都只係約20分鐘，老婆又話去浸溫泉唔會太久，半粒鐘夠晒，雖然行程有點緊迫，但都應該夠時間。去到道後溫泉站，再行多幾分鐘穿過商店街，就可以直達道後溫泉本館，呢間店一睇就知唔間單，據說千與千尋裡面間油屋就係呢度取景，老婆買左張神之湯入場券就急急腳入去(後來才發覺忘記使用廣島港拿的優惠券)。

我就回頭逛商店街，第一時間去Donguri Republic，呢間店有個特色，就係主力sell千與千尋既野，咁都可以理解，始終道後溫泉係油屋既原型，除此之外，就係sell魔女宅急便，呢點我就有d唔明，後來再上網搵左d資料，先知道同是四國既高松有一個地方叫小豆島，島上有個風車據說係魔女宅急便既取景地，唔知有冇關係。最後，呢間舖既戰利品，係條印有三色間條認證既今治龍貓毛巾。

Donguri Republic隔黎，又有一間毛巾專門店，入左去睇一陣，順手買多條"白雲"今治手巾，話就話手巾，其實用佢黎抹身抹頭都ok，因為今治毛巾吸水力實在太好。基本上道後溫泉街有唔少賣毛巾既店舖，開頭唔係好理解，後來等老婆浸完溫泉之後出黎終於明白。老婆評語，道後溫泉真係好正，古色古香，值得一來，但係入去前記得記得帶毛巾，要自備架！下次真係唔記得帶，可以去Donguri Republic 買條今治龍貓毛巾頂住先，都係600幾yen only ，當然你也可到溫泉付費借用。

最後提提大家，道後溫泉商店街好多舖都係關10點，所以黎呢度就唔好太夜，夜鬼模式不能在松山套用的啊~