愛媛貓島攻略
對我來說，貓島是整個旅程最重要的部份，為左登上貓島，之前真係做左好多功課，行程設計時亦是最傷腦根。日本其實有很多貓島，僅僅愛媛起碼就有兩個，但是這次要到的貓島－青島，有其獨特之處，首先這裡的人貓比例非常懸殊，居民不超過20，貓咪目測就上200隻，而且青島非常細，貓的密度我想是日本數一數二高了。第二，青島位於大洲市與下灘/松山中間，正好在著名景點附近，理應較方便，第三，這小島位於瀨戶內海，如果時間配合適宜，可以觀賞瀨戶內海的日落。
不過當我在搜集資料的過程，卻發覺青島並不易登上，有些人甚至連續留兩天也不能一睹貓島真身。要登上貓島，必需要配合天時地利人和，真係缺一不可。
登島的天時
去貓島最重要睇天，下雨是其中一個因素(青島上只有一個小小的休息室，沒有太多避雨的地方)。但更重要係往貓島的船極易受天氣影響，如果是浪高超過0.5米，便會停航。在冬季瀨戶內海冷空氣南下刮大風真係家常便飯，要冬季上島，本身機會就已經五十五十。為左去貓島，之前十日天天追蹤日本氣象廳天氣預報，臨登島前幾天撞正寒流，浪高一直都在1米以上，直到登到前一天晚上，浪高才減至0.5米，相當幸運。每個要到貓島的人，都必定要bookmark呢個
JMA網址，裡面可以看到愛媛附近的浪高預報。
 |
| 圖中波0.5米，降水率0%適合登島 |
交通的地利
去青島首先要到達伊予長濱，再行一分鐘到碼頭轉乘船。伊予長濱有JR直達，又正好在大洲與下灘兩個出名景點之間，本來以爲編排行程會很方便，不過當細心查找班次船期時，就會發現並不容易配合。首先是船期的限制，登島的船每天只有兩班，分別是早上8:00及下午2時30分，而由青島回程的船則是9:20分及下午4時15分，如果你要在貓島逗留長時間，就只能乘坐第一班船，然後下午4時15分回來，這樣可以有8個鐘在貓島上，不過要8時前去到伊予長濱，意味著你要搭乘第一班6時許由松山開出的JR，這樣一算大概就要5時起床了。當然，要遊覽大洲就只能另擇一天，至於打算同一天去下灘也難以配合，因為回程的船要大概4時50分在到達長濱，而返松山的JR則在傍晚5時半開出，當到達下灘的時候早已入黑。諗住一天順路玩晒3個地方......殘念啊~
如果只搭下午的船，在島上逗留一個小時又如何呢？一個下午參觀貓島，也不見得容易，因為跟你有同樣想法的人多的是，你必須提早排隊買票，船公司會在1時30分起在船上售票，也就是說你必需更早到達，由松山方向來的JR，會在12時44分到達長濱，由大洲方向來的則會早3分鐘到達，唔......這關鍵的3分鐘可能就決定你能不能登到。那麼不如就早上遊大洲，中午到長濱排隊吧（這也是我實際的行程）。如果你選擇這個方案，就必需非常精準地規劃行程，最遲8時搭乘特急JR到大洲，然後必需乘12時10分的JR到長濱，這樣大概有3個多小時遊覽大洲舊城區，若安排得當，時間是足夠的，當然午飯就要從簡了，大洲市比較大的餐廳都在11時後營業，而長濱吃的地方就更少了(而且你還要排隊啊)，請務必注意。
 |
| 長濱係一係很小的車站 |
 |
| 認住呢個牌，上面寫住船上售票時間。 |
最重要的人和
如果你很喜愛貓，其實我會建議你盡量用一天在貓島，8個多小時可以和貓貓培養一下感情嘛，不過對於非貓奴人士(例如我老婆)，要他8個鐘屈係一個不足半平方公里既小島，就唔係個個受得，所以選擇8小時還是1小時逗留貓島，也要睇你愛貓程度。另外，選擇上午登島還有一個優點，就係萬一早上停航，你還可以等到下午看看有沒有船，若然早上便知整天停航，那也可以改行程到大洲玩個夠，還有時間傍晚到下灘。而且要留意，去貓島的船只有34個位，如果早上入島的人有20人，那麼下午的船就只剩下14個位，否則的話，4時許回程時就會唔夠位。去貓到的人除左香港台灣的貓奴外，韓國人和日本人也很愛到這裡，所以亦要考慮假日的因素，盡量避開日本的長假期。
 |
| 車站距離碼頭很近，過馬路後一分鐘就到。 |
 |
| 長濱只是一個海邊小鎮，找吃的也不太易。 |
 |
| 往青島的船 |
等船趣談，黎貓島真係要講運氣
講返我地個行程，話說我地中午時由大洲出發，坐左大概半個多鐘頭既JR黎到伊予長濱，之前我已經透過google street pre-trip 過附近既街道，所以一落車站，就已經可以好肯定咁向碼頭方向進發，老婆半信半疑咁跟住黎，不到一分鐘，我地就找到往青島的碼頭，但係竟然一個人都冇，呢個時候我個心情真係緊張萬分，立即到碼頭傍個告示板，睇下有冇停航啟示，又唔多覺有，睇到前方有隻船，船上有一老伯走出來，見到我就點晒頭咁，同時做出1時30分既手勢，佢呢幾下動作頓時令我放下心頭大石，今天下午可以登貓島去了！
老婆知道有船，就開始坐唔定，話要周圍睇下，由於尋日因買野搞到差d miss左班JR，我再三提佢一點半前一定要返來，因為到時會係船上買飛，千萬千萬唔好遲到搞到功虧一簣。三分鐘後，第一個遊客黎到，唔係香港人，唔係台灣人，亦唔係日本人，係一個洋人青年，佢一大個bag，黎到碼頭塊board望左兩眼，但塊board d告示唔係日文就係漢字，佢似乎完全唔明，我問左去一句 cat island?，佢即時笑笑口咁點晒頭，果然都係一個要登島既貓奴 lol，原來佢完全唔知道船期，甚至連回程時間都唔知，佢只知到一點，就係呢度有個島貓多過人，所以就黎左，仲要係即日大朝早由京都坐JR直達大洲，再搭返轉頭黎長濱。同我地唔同，佢行程完全冇規劃，唔用google map，甚至唔預先book酒店，一個大背囊，一部相機，一張全國版JR pass 就開始遊走日本，完全係電波少年feel，有些人專程留幾日都上唔到貓島，呢位人兄卻神來之筆話黎就黎，黎貓島有時真係要講下運氣......
一路同佢吹水一路等船，越近1時半，開始越多人黎，有華人、有日本遊客、也有島上居民。d居民非常有趣，佢地顯然知道你係外國遊客，但係依然好似當你係普通日本人咁同你家常便飯咁傾偈，雖然我完全唔識日文，但係又好神奇咁feel到佢講乜，大概咁講：「咦，你地又係黎搭船架，我又係呀，我住呢度架，食左飯味?個島冇食堂架記住.....」大概咁既野之類啦，總之就好似平時同街坊吹水咁，都幾親切。
好客的伊予長濱
賣飛前10分鐘，老婆終於回來，今次佢又帶住一袋野，睇真d，乜又係柑， 佢真係好鍾意食生果喎......原來老婆頭先去左附近搵野食，佢逐間店咁搵，俾佢搵到間家庭式食店，佢入左去，點知人地都未準備好開門，但店長仍然非常好客，急忙招待。打攪完人地一輪，正要離開之際，老闆竟然仲特意送左包柑俾老婆，真係神奇，明明係老婆冒失撞入人間鋪到，但竟然係個店舖覺得唔好意思送返d野俾你，日本人d處事有禮既程度真係好到你唔信。
一點半已到，日本伯伯揮揮手，叫晒我地上船。一進船倉，就有一張小桌子，我地先填左份表，然後買票，之後就「自由席」隨便坐，也可以選擇坐船尾，可以直接一覽外面的風景，最後，下午這程登船的人合共15人，再加上早上來的遊客，34個名額差不多用盡。
登島前每人有一張注意守則。島上無食堂無便利店，飲食自備，進食時請到專用休息室，唔好俾貓進內，自己垃圾自己帶走，呢個就規矩黎架啦，唔好諗住有垃圾桶，貓島不是旅遊區，係一個有人住既小島黎，千萬不要為左睇貓而打擾民居，更加唔好走入民居範圍，島上有專用餵食區域，一上島碼頭向左轉就是了，要餵食可到那裡。
 |
| 長濱的食點不少都係家庭式經營，很地道 |
 |
| 碼頭全景，認住條紅橋~ |
 |
| 船費來回才1360yen，超值！ |
 |
| 回望碼頭 |
 |
| 向青島出發~ |
貓島見聞
經過大概半個多小時航程，終於黎到貓島，我地係島上大概可以逗留1個多小時，真係光陰值千金。一上到青島碼頭，已經見到一大班貓列隊，真係好多貓，周圍都係，絕對唔洗搵，貓多過人。貓島其實好細，碼頭對正係休息室，左邊有小路通向遊客餵食地點，右邊有民居，並且有一個似乎係屬於島民既餵食點，再入d就係山徑小路，通向島既後方，沿路都係貓星人。
貓島d貓好特別，你話佢係街貓咩，又唔完全係，佢地其實唔係好怕人，但係會有貓個種天然防備心，會同你一直保持距離，但係又唔會好似街貓咁望兩眼飛奔逃走。你會見到週圍都係貓，但係就硬係唔俾你摸，如果你養開貓，識同佢地按摩，咁好快就會有幾隻自動返肚，但係一般黎講貓島既貓都唔係咁理人。
直到你開始餵食，情況就會180度轉變，所有貓會從四方百面朝向你d食物黎，開頭我仲好天真咁以為可以逐隻餵，揀d比較弱既先餵之類，後來發覺根本唔work，d貓有晒經驗，會先咬你手指（假咬），你一縮d貓糧就會跌落地，咁你就輸左喇，唔使五秒幫你清晒，後來我見d島民餵貓，直接分晒係d兜到，同家貓做法一樣，d貓自動去食，當然打架爭食，搗亂樣樣齊啦，仲會係咁催促主人，呀唔係，貓奴快d分糧......
