話說暑假同老婆重溫日劇經典「東京愛情故事」，最後一集講述男主角元治返去愛媛故鄉，尋找愛侶，最後與她在海邊車站分手，大家睇完好滾動，於是就萌生假期時去愛媛旅遊，順便睇下附近有冇貓島之類睇下。係去愛媛之前，只係知道呢個地方應該都算係日本鄉郊地方，於是就預左6日假期。但係之後一直冇做功課，直到老婆買左兩張來回福岡機票，先下決心做行程規劃。
當我google map睇到愛媛既地理位置時，先發現愛媛其實離福岡好遠，直飛廣島、高松、岡山甚或大阪都要比較近，睇黎真係買錯機票。而今次去日本除左去東愛景點外，老婆主要係想影下山水花草日本名勝，最好有得睇埋紅葉日落，仲要浸下溫泉。點樣係六日內滿足晒所有要求，真係諗到頭都爆。
必不可少瀨戶內海 JR PASS
規劃時第一件事要諗既係車費，但由福岡去到愛媛松山既西日本JR pass真係好似唔多覺，最近磅都係只係先買去廣島岡山既pass再加一張四國pass，但咁樣加埋都已經超過20000 yen，於是我又諗水路去愛媛，發覺係有船從北九洲到松山，但係水路價錢都唔平，而且要overnight坐船，會幾辛苦下，所以都係放棄。
後來再搵左一些資料，發現有一張瀨戶內海5 days pass，包晒由博多到松山以及東愛景點大洲市既新幹線/JR，最重要係包埋由廣島到松山既高速船票，張pass都只係17000 yen，僅兩程新幹線已經值回票價（見下圖)，fit晒。於是我就plan左一個6天既瘋狂瀨戶內海之旅。
 |
| 這將西遊紀行JR PASS可以玩盡整個瀨戶內海 |
 |
| 若無 JR pass交通費會將近4萬yen，使用pass後足足節省22000 yen！ |
行程表
DAY1 到達福岡後，由博多乘新幹線直達廣島，遊覽原爆各個遺址博物館，晚上行本通商店街食廣島燒。
DAY2 上午遊廣島城/縮景園，下午遊宮島食鰻魚飯+蠔，仲要上山/睇日落/影夜景
DAY3 上午坐船到愛媛松山，沿途到東愛海邊車站梅津寺遊覽，中午遊松山城，下午到下灘影日落，晚上可以行大街道商店街兼坐摩天輪。
DAY4上午坐JR特急列車到大洲睇東愛景點+大洲城+臥龍山莊，下午到青島(著名貓島)，傍晚瀨戶內海睇日落，晚上到道後溫泉泡泡。
DAY5上午坐JR特急列車到岡山，暢遊岡山城及後樂園，傍晚坐新幹線回福岡天神shopping。
DAY6中午到稚加榮食刺身，下午遊天神地下街，傍晚搭飛機返香港。
呢個plan如果順利既話，6日內可以暢遊福岡、廣島、宮島、松山、大洲、岡山6個地點，參觀4座城堡，3座庭園，兩大聯合國文化遺產，仲可以浸溫泉、遊貓島、行山、影紅葉、日落，環繞大半個瀨戶內海，一次過橫跨九州本州四國，總行程超過1000公里.......
成個行程會用盡晒張JR pass，除左福岡市內地下鐵、廣島市內電車、松山/大洲市內交通及貓島來回船票要額外費用，全程車船一張pass搞掂。住宿方面實際只係廣島住2晚，松山住2晚，最後1晚住福岡，唔使晚晚轉酒店。