非自駕遊，六日五夜四國環島遊可能嗎？
話說自從上次瀨戶內海冬日之旅，上面呢個命題就一直係我個腦海徘徊。上次用六日五話就話去晒本州、九州、四國日本三大島，但實際上，四國只係玩左愛媛縣中予地區，其他三個縣香川、德島及高知，基本上都冇去過，硬係覺得有點遺憾。所以當返來香港之後，就即刻繼續搵四國既觀光資料。四國唔係一個好大既島，而且部份景點也是香港人常去既地方，用六天環島遊看似冇乜難度，但係當深入了解之後，就發覺六日其實係極唔夠，多數人只會將香川/德島當作關西既周邊地區順便遊覽。由於四國沒有新幹線接駁，利用普通JR跨縣移動閒閒地都要數小時，要進行環島遊，起碼都會花八至十日時間，一些深度遊更會花上兩個星期。當然，若然選擇自駕遊，情況會好唔同，利用高速公路，兩日一夜就足以快閃愛媛、高知及德島三縣，六日時間就夠晒plan一個相當唔錯既四國深度遊。奈何唔識揸車，所以今次就只好plan一個純粹用JR既環島旅程。
輕鬆遊 vs 玩到盡
四國對香港人來說有一個方便之處，就係有直航機到高松，好多非自駕既香港旅客，都會利用高松作為根據地，每天玩一個縣，這種玩法好處時不用每天轉酒店，早出晚歸輕鬆應對，對時間精準要求相對較低。壞處係一些稍稍偏遠既地方，例如高知東部及西部，愛媛中部及西部，就好難去到，要去一些較遠既瀨戶內海小島，亦唔容易。不過我地今次係一個補完計劃，除左之前愛媛既中予地區外，我地既目標係要行遍四國JR可達其他地區，一些熱門地點固然要去(例如：金刀比羅、鳴門)，JR冇掂到既偏遠冷門景點(例如：四萬十、佐柳島、翠波高原)，亦要想辦法去，再加上正值櫻花季節水尾，編排行程時要亦諗埋睇櫻花既可能性。由於個plan咁貪心，所以就注定冇得懶，利用JR順時針環島遊，除左頭兩晚住高松，之後都要晚晚一縣一酒店。
行程表
DAY 1:高松機場→栗林公園→紅燈塔→晚膳德島拉麵→瓦町買手信【宿高松大和酒店】
DAY 2:金刀比羅宮&琴平→桃陵公園→午膳多度津魚生→佐柳島(貓島)→丸龜城→晚膳一鶴骨付鳥【宿高松大和酒店】
DAY 3:鳴門遊覽船→渦之島→鳴門觀景台→德島眉山→晚膳活魚水產【宿德島Smile Hotel】
DAY 4:大步危遊覽船→祖谷蔓橋+琵琶瀑布→高知城(日景)→午膳明神丸→桂濱→ひろめ市場→高知城(夜景)【宿高知Sunrise Hotel】
DAY 5:四萬十川 42KM單車之旅→江川崎→宇和島→松山【宿松山東急REI】
DAY 6:伊予三島→翠波高原→翠波峰→高松返港
 |
| 除高知東部及德島南部外，是次旅程已覆蓋大部份JR可達之處 |
上述六日行程，合共到訪近30個景點，基本上每天都係早出晚歸，上山下海，JR、車船、纜車、的士、巴士全部搭晒，第四日行程仲會有一個42km既四萬十單車之旅，期間要帶住行李，完全係挑戰體能極限！而且當中很多行程容易受天雨影響，例如貓島，只要一下雨，半天就要浪費，單車遊亦係開始左就冇得後悔，就算下雨也要硬住頭皮完成。有些景點則每天只有數班車到，只要行程稍為延誤，就會被困大半天。最後一天翠波高原之旅，更係冇公共交通可到，而且網上毫無中英文資訊，只有少量隻字片語日文資料，去唔去到都真係要靠彩數。