【DAY3 下午】松山城 x 下灘愛媛篇

松山市內交通

由梅津寺乘郊外電車，大約20分鐘就能到達松山市區，松山是四國最大的城市(其實也只是50萬人口)，這個城市交通方便，搭飛機有松山機場，海路可從松山觀光港直達廣島或九州，陸路有JR接通，由京都大阪地區大概也只需要3至4個小時。此外，我們可透過伊予鐵路到大洲、內子等地方，亦有高速巴士直達高知等地，若要暢遊四國，松山是一個很不錯的據點。

去到松山站後，我們再轉市內電車到酒店，松山揀的酒店同樣是東急REI，位於大街道站附近，一落電車對面就係，鄰近坂上之雲博物館、松山城及商店街等景點，非常方便。

這是伊予鐵路郊外和市內電車的路線，千萬別跟JR搞亂啊

伊予鐵路松山站，注意跟JR松山站是兩個不同的站來。

市內的電車跟郊外電車感覺又不一樣。

松山城與今治毛巾

放下行李時已近中午時份，接住即刻把握時間到附近的松山城。同之前參觀過既廣島城復修天守唔同，松山城係全日本12座現存天守之一，極具歷史價值，連立式設計更是與姬路城、和歌山城齊名的三大天守，係一個絕對唔可以錯過既景點。上松山城有幾種方法，可以慢行上山，沿途欣賞景點，也可以單程纜車上，落山再遊景點。由於我地時間比較緊張，再加上之前已經行左山，所以選擇纜車上落快靚正。由酒店步行到松山城，大概只有10分鐘路程，去到纜車站買票，將之前係廣島港索取既優惠券拿來用可以有折扣。松山城纜車有兩款，一款係最普通既卡箱纜車，另一種係全開放式單人覽車，可以全方位觀賞沿途美景，非常過癮，不過唔好掛住影相搞到跌野，唔係執返都有排搞。

上到山再行多一陣，就可以見到松山城，城下兩邊有櫻花樹，可惜季節唔啱如果唔係一定好靚。好奇怪遊客唔係好多，可以係半包場狀態下無阻礙任影，上次去大阪城個時，影親景都有人閃過，松山城冇呢個問題。上天守前要另買門券，記得用優惠券。相比廣島城，松山既天守唔可以行出去，不過好在窗戶都尚算開揚，加上松山城本身就係山上，係全市最高點，高居臨下，就好似整個松山市在腳下，非常有氣勢，此外亦可以遙望瀨戶內海，相信較正日落時間黎會更加靚。係松山城大概逗留一個鐘左右，就急急腳落山。

落返纜車站，第一時間過隔黎間伊織 IORI 今治毛巾專賣店，今治毛巾質素係日本係首屈一指，區區一條毛巾都要通過多項測試先可以有認證，據說一條合格既今治毛巾要有極佳既吸水能力，入水5秒內要即沉，日本人既認真程度有時真係唔到你唔服，不過一分錢一分貨，今治毛巾對你既荷包吸水能力亦都非常出眾，一條簡簡單單既白色浴巾，閒閒地5000日幣！當然你會話，呢個價錢淘寶中國製浴巾夠買30條有突，不過到場摸上手，便知龍與鳳，今治毛巾既柔軟度同色準，絕非普通貨色可比擬。不過，想買平一點亦唔係冇辦法，IORI對面有一間普通「今治製」毛巾店，未必條條都有三間條認證，但起碼叫做Made in Japan，呢樣都夠殺食啦，平既幾百yen都有交易。

買完毛巾又係覓食時間，行前多幾步就係角屋，利用廣島港索取既松山funpass優惠，叫左兩客地道宇和島鯛魚飯，呢個係黎松山必食既野，生雞蛋配生魚片再撈飯，真係正到爆，不過呢種食法真係係日本先敢試。

松山城纜車的入口

有兩種纜車，右邊是單人無車廂吊索，左邊是一般纜車，任君選擇。

到達山登纜車站，走一小段路就可以看到城牆

這就是松山的天守閣，很美。

近觀更加宏偉

天守閣頂端可以飽覽整個松山市，也可遙望瀨戶內海

市內摩天輪，似乎很有趣。

松山城天守條鯱，每個天守緊有一條

城下建築物就好似積木咁樣

松山城天守係全市最高點

好似睇緊日本風情畫咁

落山了......畏高的話就乘卡箱纜車

一條正品今治毛巾會有三間認證標籤

纜車站隔鄰就是知名的今治毛巾專賣店，平一點的可到圖中這間買，就在對面

午餐品嘗松山地道美食鯛魚飯，正到爆！

途中見到少爺小火車，古色古香啊。

下灘交通攻略

食完飯就拿拿臨搭電車去JR站，去下一個目的地下灘，沉氣d都要提一提，JR松山驛唔係伊予鐵路既松山市驛，前者係搭JR去大洲岡山等地，後者只係搭去松山市郊既電車黎，好大分別架，唔好搭錯線。行到閘口show張瀨戶內海JR pass就可以一直搭到大洲市都冇問題，入閘後上橋過3號月台就可以安心等車。

去下灘有好幾種方法，第一種係自駕遊直達下灘站，門口有位停車。第二種係奢侈玩法，搭乘伊予灘物語觀光列車(大洲篇)朝早8時許出發，10時許到大洲市，期間會停下灘。伊予灘物語觀光列車JR pass不適用，必需額外付費，早餐連車資等費用5300 yen，不過沿途會有導賞講解(日語)，車箱其實就係餐卡，幾有特色，不過問題係極難book位，亦唔係日日開，要網上預約申請，更大問題係下灘站只係停8分鐘，架火車仲會係個站到阻住晒個景，如果你係衝住下灘而來，就唔係好建議搭呢班車，不過如果係同小朋友去玩，我估呢班車佢地會搭得幾開心。另一種方法就係調返轉早上先去八幡浜/大洲玩，下午搭伊予灘物語觀光列車(道後篇)返松山，包一個下午茶，盛惠6130 yen，中途一樣會停下灘，但都只係停10分鐘，亦未必能夾到日落/晚霞時間。

如果你要有充足時間係下灘停留影相，咁就無可避免要花一個下午，由松山出發可以搭2時半或3時許JR，分別會係大約3時半及4時半到到達下灘，12月下灘日落時間大概5時，考慮到要有足夠時間影相，同埋預早找位置set腳架，我選擇了搭2時半的JR慢車，影埋日落晚霞乘5時51分班車離開，咁前後就有3小時以上係下灘影個夠，應該可以滿足到老婆攝影需要。當然最舒服既辦法就係早上遊覽大洲，下午再到下灘，不過我第二日下午要去貓島，所以呢種一程來回順路既玩法對我來說實在不適用，冇辦法點都要分兩日，大洲貓島下灘好難一程玩晒。

臨出發前仲有一段小插曲，我地大約2點前到達松山JR站，班車開2點半，預鬆左時間，呢個時候老婆順便去廁所，咁我都冇為意，反正時間多的是，點知班車提早10幾分鐘到左，仲要得一卡咁大把，而呢個時候依然未見老婆蹤影，眼見月台d乘客入晒車箱坐定定，車長呢個時候行左出來望左我一眼，彷彿諗緊我呢條友仔係咪搭呢班車，然後行返入車箱，我睇睇月台個鐘，仲有8分鐘，我心諗......車長你唔係打算提早開車嘛......我睇過新聞話日本d火車早開左都會引咎道歉過喎......呢個時候真係天人交戰，真係痛恨自己唔好好學多兩句日文......正當我諗住查下google「唔該等埋」日文點講既時候，老婆終於出現，仲拿住一大包野，原來去完廁所後佢俾間七仔吸引左過去，買左一大包柑，之前同佢講過愛媛的柑好出名，佢話點都要試一試，我一睇個包裝......原來係一間岡山公司出既廣島柑(-_-;)，差D俾呢包野搞到 miss班車，一坐定，車長準時開車。

這個才是松山JR站，未來幾天都要來這裡

要去下灘大洲方向3號月台無誤，伊予灘物語觀光列車也是這個月台

就係呢包柑搞到差D miss 左班車

下灘影日落都要講彩數

多雲，間中有陽光，氣溫1至4度，下雨機率10%，置信度A。

呢個係日本氣象廳當日既天氣預測，為左今次既行程，我已經連續10日check住愛媛既天氣，因為天氣狀況決定睇唔睇到日落，海面狀況會決定去唔去得成貓島，下灘、大洲同埋貓島之間既行程調動，又會影響松山及之後岡山既旅程，牽一髮而動全身。

我坐住呢班慢吞吞既JR，一路望住個天，一路估量近睇唔睇得成日落，之前已經check好晒日落時間同埋日落位置，而家就只差d雲散唔散。經過一個多鐘頭車程，終於黎到。一落車，果然冇黎錯地方，下灘不愧為日本JR宣傳海報既御用場景，海天車站完美配搭，齋影候車長凳都好靚，事實上，站台將長凳冇人敢坐耐，以免阻住其他人影相。

黎得呢個站，目的只有一個，影相，每個遊客，手上都會拿住一部相機，不斷咁影呀影呀......當然呢d咁既景點，諗都諗到會好受香港人歡迎，隨時都會聽到廣東話......同埋台式國語。至於日本人呢，係我幾個鐘頭既簡單觀察，都會黎，多數都係坐車黎路過影下咁上下。

落左車冇耐，老婆已經進入忘我境界，不斷影影影，乜都影一餐，要我不斷催促，佢先肯移玉步去其他景點。下灘除左車站本身外，其實附近都有好多影相位，車站左邊沿馬路，一直向前行，可以從另一角度影海影日落，沿途d花花草草，老婆當然都唔會放過，經過一個慰靈碑後穿過鐵路向前行，有一條小路通向橋下石灘，石灘盡頭會見到兩條鐵路伸入海中，呢個又係傳說中既千與千尋水中鐵路場景，如果較得好角度，應該會影到特別既相。

去完石灘後，發覺老婆手上多左一束花，原來係有個日本婆婆見佢不斷影d花，特意送左一束俾佢，日本人認真好客，有時係好客到難以置信。原路行返去下灘車站等睇日落，呢個時候天色越來越唔對路，唔單止多雲，仲有幾滴雨粉，由瀨戶內海飄黎既雲，撞山後變成雨。我開始發覺唔單止個天唔對路，連我個頭都唔對路，冇留意海風加上寒冷天氣，形成最難頂既濕凍吹住個頭，吹到越來越頭痛，向來身體壯健既我都忍唔住拍返粒panadol，順便去下灘咖啡店到嘆返杯熱紅茶。

越近日落，個天就越灰暗，腳架已set好，對正日落位，偏偏就係個到有舊大黑雲，同我地一樣set腳架仲有一個日本青年，佢望住個海，嘆氣左聲，然後同我笑笑口咁講左句日文，呢一刻我突然間識聽佢講野，佢好似話：妖....咁既天我地都係影唔到日落架喇，真係徙gas.....，我亦笑笑口答返佢一句：yeh，究竟我up乜鬼......可能真係頭痛到懵左。老婆突然拿左一個水晶球出黎，真係服左佢，由香港遠道帶個腳架黎日本都唔夠，仲要帶埋呢舊野黎到下灘......佢拿住個水晶球係咁影，唔知佢影乜，攝影既野我真係識條鐵。

5時已過，結果都係影唔到日落，有d人見天色唔多好，未到日落已經坐早一班車返松山，不過老婆依然未放棄，竟然利用腳架慢快門影車軌......影車軌呢家野乜唔係應該係中環影咩？呢度d車疏疏落落，有時十幾廿秒都冇一架過，點影......冇理佢繼續等車。臨上車之際佢俾d車軌相我睇，又真係俾佢影到，哈哈，下灘車軌新玩法，堅持到底有時真係會有成果。

大概6時，天都黑晒返松山既車先到，而我個頭就越來越痛，於是同老婆講，今晚既行程係提早返酒店休息，呀唔係，麻煩去一去大街道商店街買包日本製既綜合感冒藥粉，如果唔係聽日都去唔成貓島。

唔到你唔服，食左包感冒粉唔夠半粒鐘，頭痛明顯好轉，panadol都搞唔掂佢搞得掂，不過呢隻藥據聞含可待因，日本屬第二類藥物，係香港係受管制藥物，唔可以亂買。